შინაგან საქმეთა სამინისტროს საგანგებო სიტუაციების მართვის სამსახურის ოპერატიული მართვის ცენტრის ოპერატორებმა, სპეციალური სასწავლო კურსი გაიარეს.
სწავლების ფარგლებში მონაწილეებმა განიხილეს ისეთი მნიშვნელოვანი საკითხები, როგორიცაა: ძირითადი ხანძარსაწინააღმდეგო ტაქტიკა; ძირითადი ტექნიკური გადარჩენა; გადაწყვეტილების მიღების ტექნიკა და ეფექტური კომუნიკაცია; პირველადი ფსიქოლოგიური დახმარება - ემოციური/სუიციდური ზარების გამკლავება; საუბრის ტექნიკები და მხარდაჭერა; ქიმიური, ბიოლოგიური, რადიაციული და ბირთვული ინციდენტის იდენტიფიკაცია და ტაქტიკა.
აღნიშნული სწავლება განხორციელდა გაეროს საპროექტო მომსახურების ოფისის (UNOPS) ორგანიზებითა და ევროკავშირის ფინანსური მხარდაჭერით, პროექტის - „ტექნიკური შესაძლებლობების განვითარების ხელშეწყობა ადამიანის უსაფრთხოების უზრუნველსაყოფად” - ფარგლებში.
პროექტი „ევროკავშირი უსაფრთხოებისთვის, ანგარიშვალდებულებისა და დანაშაულის წინააღმდეგ ბრძოლისთვის საქართველოში (SAFE)“ - ინიციატივის ნაწილია და 2020 წლიდან საქართველოს შინაგან საქმეთა სამინისტროს საერთაშორისო ურთიერთობების დეპარტამენტთან მჭიდრო თანამშრომლობით ხორციელდება. მისი მიზანია საქართველოს უსაფრთხოების სექტორში ჩართული სახელმწიფო უწყებების ეფექტიანი და ანგარიშვალდებული მმართველობის ხელშეწყობა.
