შინაგან საქმეთა სამინისტროს საგანგებო სიტუაციების მართვის სამსახურის კახეთის მთავარი სამმართველო საავარიო-სამაშველო და სახანძრო ოპერაციებისთვის აუცილებელი აღჭურვილობით გადაიარაღდა. სპეციალურ ხელსაწყოებთან ერთად, სამმართველომ მიიღო განათების სისტემა, რომელიც რთული ხილვადობის პირობებში სახანძრო-სამაშველო სამუშაოების ჩატარებას უზრუნველყოფს. სპეციალური აღჭურვილობა დედოფლისწყაროს განყოფილებისთვისაა განკუთვნილი და მნიშვნელოვნად გააუმჯობესებს მუნიციპალიტეტის მასშტაბით საგანგებო სიტუაციებზე რეაგირების ხარისხს.
კახეთის მთავარ სამმართველოს აღჭურვილობა სამსახურის სახანძრო-სამაშველო ძალების დეპარტამენტის უფროსის მოადგილე - მამუკა სეფიაშვილმა გადასცა. ღონისძიებას, ასევე, ესწრებოდა კახეთის მთავარი სამმართველოს უფროსი - ალექსანდრე ბულკაშვილი.
საგანგებო სიტუაციების მართვის სამსახურისთვის რეგიონული დანაყოფების საერთაშორისო სტანდარტების შესაბამისად აღჭურვა ერთ-ერთი პრიორიტეტული მიმართულებაა. მთელი საქართველოს მასშტაბით, სახანძრო-სამაშველო განყოფილებებში არსებული ტექნიკური საშუალებების გაუმჯობესების კუთხით სამსახური წლებია საერთაშორისო პარტნიორებთან თანამშრომლობს, რაც 2022 წელსაც აქტიურად გაგრძელდება.
